Month: July 2020
నేనూ నువ్వూ
నేనూ నువ్వూ
==========
నేనేమో
చిటికెడు వెలుగును కోరుకున్నాను
నువ్వేమో
పిడికెడు చల్లని వెన్నెలను మోసుకొచ్చావు
నేనేమో
దాహం తీరేందుకు దోసెడు నీళ్ళడిగాను
నువ్వేమో
వానా కాలాన్నే వెంటేసు కొచ్చావు
నేనేమో
భూమిలో నాటడానికో విత్తనాన్ని ఆశించాను
నువ్వేమో
ఏకంగా పంటనే పరిచేసావు
నేనేమో
చిన్న గెలుపు కోసం తపన పడ్డాను
నువ్వేమో
వాకిట్లో విజయ తోరణమే కట్టావు
ఇంతకూ
నేనెవరు నువ్వెవరు
నేనేమో చిన్ని ఆశను
నువ్వేమో కొండంత ఆత్మవిశ్వాసానివి
–వారాల ఆనంద్ =======================================