యాదోంకీ బారాత్=102..పెనవేసుకున్న పత్రికలు

Posted on September 24, 2023

యాదోంకీ బారాత్=102

++++++ వారాల ఆనంద్

పెనవేసుకున్న పత్రికలు

*****************

     జ్ణాపకాల పోరాల్లోకి వెళ్లినప్పుడు విజయాలూ ఓటములూ, ఆసక్తులూ అనాసక్తులూ అన్నీ కళ్ల ముందు సినిమాలా కదలాడతాయి. నిజానికి జీవితం మరే నవలకన్నా కథ కన్నా సినిమా కన్నా కూడా గొప్ప నాటకీయతతో నడుస్తుంది. కానయితే జీవితంలో నడక లేదా పరుగు దాదాపుగా మన ప్రమేయం అంతగా లేకుండానే సాగుతుంది. అన్నీ మనం అనుకున్నట్టు సాగవు. చిత్రంగా జీవితం అనేక మలుపులు తిరుగుతుంది. కొన్ని చోట్ల నిలబడి పోతుంది. కొన్ని చోట్ల సాగిపోతుంది. ఒక గమ్యాన్ని అనుకుని బయలుదేరిన ప్రయాణం నడుమ నడుమ అనేక మజిలీల్లో మన ప్రమేయం వుండీ మరోసారి లేకుండానే నిలబడిపోవాల్సి వస్తుంది. అందుకే ఒక కవినో రచయితనో చూసి అరె ఇంతకుముందు ఈయన ఇట్లా లేడే. ఇంత సుజనాత్మకత ఎట్లా వచ్చింది అని అనుకుంటాం ఆశ్చర్యపోతామ్. ఆ సృజనాత్మక గొప్పదనాన్ని అంగీకరించడానికి చాలా మందికి మనసొప్పదు.  ఇది సహజం.

++++

ఇక నా జీవితంలో అనేక దిన వార మాస పత్రికలు పెనవేసుకూని వున్నాయి. మొదటినుంచీ ఆయా పత్రికల్లో వచ్చిన కాలమ్స్ నన్ను బాగా ఆకర్షించేవి. డిగ్రీ చదువుతున్నప్పుడే కరీంనగర్ లో అనంత స్వామి, మొయిజ్, శ్రీ కృష్ణా బుక్ స్టాల్ లాంటివి డైలీస్, మగజైన్స్ అమ్మేవి. నాకు అప్పుడే ఇల్లస్ట్రేటెడ్ వీక్లీ, కార్వాన్, హిందూ, ఇండియన్ ఎక్స్ప్రెస్ లాంటి జాతీయ పత్రికలు, దిన పత్రికల ఆదివారం సంచికలూ, తెలుగులో వచ్చేఆదివారం అనుబంధాలూ ఎంతగానో ఇష్టంగా చదివే వాడిని. ఇల్లస్ట్రేటెడ్ వీక్లీ లో వుండే పేజ్ మేకప్ పేయింటింగ్స్ లా వుండేది. ఆ పేజీల్ని చదవడం కాదు చూడ్డమే గొప్ప ఆనందాన్నిచ్చేది. మళ్ళీ అలాంటి పత్రికను, పేజ్ నేషన్ ను నేనయితే చూడలేదు. ఆపుడు అన్నీ పత్రికల్లో కథలు వ్యాసాలూ కొన్నింట్లో కవితలు చదివే వాణ్ని కానీ క్రమం తప్పకుండా వార మాస పత్రికల్లో కొందరు రాసే  కాలమ్స్ నన్ను బాగా ఆకర్షించేవి. క్రమంతప్పకుండా చదివే ప్రయత్నం చేసేవాన్ని. బహుశా అదే ఆసక్తి నేను సినిమాల మీద సాహిత్యంలో కాలమ్స్ రాసేందుకు దోహదం చేసిందనుకుంటాను. మా కరీంనగర్ జిల్లా స్థాయి పత్రికల్లోనే అయినా కొన్ని కాలమ్స్ నా రచనా జీవితంలో గొప్ప సంతోషాన్నిచ్చాయి. సినిమాల విషయం లో రాష్ట్ర స్థాయి పత్రికాలు నాకు అవకాశాల్నిచ్చాయి.ఇట్లా గొప్ప అందమయిన తీగల్లగా నన్ను పెనవేసుకున్న పత్రికల ప్రపంచం లో మొట్టమొదటి పత్రిక ‘చిత్రిక’, అది కరీమంగర్ నుంచి శ్రీ పురాణం రామచంద్ర సంపాదకత్వం లో వచ్చిన వార పత్రిక.అందులో నా జీవితం లో రాసిన మొట్ట మొదటి కథ అచ్చవడం తో పాటు పత్రిక నిర్వహణ తదితరాల్ని దగ్గరగా చూసే అవకాశం కలిగింది. ఇక అందరమూ విజ్జన్న అని పిలుచుకునే బి.విజయకుమార్ సంపాదకుడిగా వెలువడిన గొప్ప సంచలనాత్మక ప్రగతిశీల సాయంకాలం దిన పత్రిక “జీవగడ్డ”.  అందులో నేను మిత్రుడు కె.ఎన్ చారి సూచన ప్రోత్సాహాలతో ‘వారానందం’ కాలం మొట్టమొదటిసారిగా రాశాను. కొంచెం హాస్యం వ్యంగం మేళవించి ఆనాటి సామాజిక అనుభవాల్ని ప్రతివారం ఆదివారం రోజున రాసిన కాలం అది.అప్పుడు చారి ‘న్యాయవాదం’, నరెడ్ల శ్రీనివాస్ ‘పెన్నుపోటు’, అల్లం నారాయణ ‘ఎన్నెల కోనల్లో’, గోపులింగా రెడ్డి ‘జానపదం’, తదితర కాలమ్స్ రాసేవాళ్లం. నిజానికి జీవగడ్డ ఆనాటి ఉత్తర తెలంగాణ సామాజిక,రాజకీయ,ఆర్టిక, విప్లవ పోరాటాలకు నిజాయితీగా అద్దం పట్టిన పత్రిక. విజయ కుమార్ ఎన్నిరకాల ఒత్తిడులు వచ్చినప్పటికీ చివరంటా తన బాటను విడిచిపెట్టలేదు.అసలా పత్రిక సంచికల్ని బధ్రపరిచి డిజిటలైజ్ చేయాల్సి వుండింది. కాకుంటే మాతో కూడా పోరబాట్లు జరిగాయి. అల్లం నారాయణ కాలం , నా కాలం పుస్తకంగా తెద్దామనుకున్నాం కానీ ఎందుకో అది అప్పుడు కార్యరూపం ధరించలేదు. అప్పుడు చారి ని కొందరు అడిగే వారు ఆనంద్ అంటే ఎందుకు ప్రత్యేక అభిమానం అని..దానికి ఆయన నవ్వుతూ ఆనంద్ పనిచేసి వచ్చిన ఉస్మానియా రైటర్స్ సర్కిల్ లో నేనూ పని చేశాను.  అదీ ప్రత్యేక అభిమానం అనేవాడు. అట్లా జీవగడ్డ నా మొదటి ‘కాలం’ రచన మొదలయింది. జీవగడ్డ ఆఫీసుకు క్రమం తప్పకుండా వెళ్ళే వాళ్ళల్లో ఆత్మీయ మిత్రులు నారదాసు లక్ష్మణరావు, దామోదర్ రెడ్డి,పెండ్యాల సంతోష్,కుమార్ ముఖ్యులు.

జీవగడ్డలో రాసినప్పటికీ ఆ పత్రిక నిర్వహణలో నా ప్రమేయం అంతగా లేదు. కానీ 90ల్లో పొన్నం రవిచంద్ర సంపాదకుడిగా కరీంనగర్ నుంచి వెలువరించిన ‘మానేర్ టైమ్స్’ పత్రికలో నా ప్రమేయం కొంచెం ఎక్కువగానే వుంది. నేనప్పుడు వావిలాలపల్లి లో కిరాయి ఇంట్లో వుండేవాడిని. రవిచంద్ర పత్రిక గురించి అనుకుని తన హైదరబాద్ మిత్రులతో చర్చించి పత్రిక తీరు, దానిలో వేయాల్సిన కొన్ని కాలమ్స్ అనుకుని నా వద్దకు వచ్చాడు. అప్పటికి ఊర్వశి కళాస్రవంతి లాంటి సంస్థాలను నిర్వహించినవాడుగా నాకు మిత్రుడు. ఇద్దరం చర్చించుకుని సాహిత్య పేజీ వుండాలనీ కూడా అనుకున్నాం. నేను నా లోపలేక్కడో వున్న కాలం ఆలోచన గురించి చర్చించాము.’మానేరు తీరం’ పేర రాయాలని నిర్ణయించుకున్నాం. సాహిత్య పేజీకి దర్భశయనం శ్రీనివాసాచార్య,నందిని సిధారెడ్డి లాంటి అనేక మంది కవుల కవితలతో మానేర్ టైమ్స్ రూపుదిద్దుకుంది.రాష్ట్ర  స్థాయిలో ఆ పత్రికకు మంచి పేరు వచ్చింది. కాలం రాయడం తో పాటు రాజకీయ వేత్తలు సుద్దాల దేవయ్య, రాజేశాం గౌడ్ లాంటి రాజకీయ నాయకుల ఇంటర్వ్యూలు తీసుకోవడంలో కూడా నేను సహకరించినట్టు గుర్తు. అట్లా మానర్ టైమ్స్ లో రాసిన కాలం రచనలన్నింటి కలిపి “మానేరు తీరం” పేర 1998 లో పుస్తకం గా తెచ్చాను. ఆ పుస్తకం నా సాహిత్య జీవితంలో ప్రధాన మజిలీ. నాతో ఆ కాలం రాయించిన మనర్ టైమ్స్ పత్రికకు సంపాదకుడికి కృతజ్ఞతలు చెప్పుకోవాలి. ఇక సినిమా కాలమ్స్ విషయానికి వస్తే అలిశెట్టి ప్రభాకర్ నేను కలిసి ‘పల్లకి’ వార పత్రికకు వెళ్ళాం.  అప్పుడు సంపాదకుడు శ్రీ విక్రమ్ ప్రోత్సాహం తో ‘డైరెక్టర్స్ డైరీ’ కాలంగా రాశాను అందులో భారతీయ సమాంతర సినిమా వైతాళికుల గురించి వారం వారం రాశాను. అప్పటికి తెలుగులో సమాంతర సినిమా దర్శకుల పైన వచ్చిన మొట్టమొదటి వ్యాసాలవే. వాటన్నింటి కలిపి 1999 లో ‘నవ్య చిత్రా వైతాళికులు’ పేర పుస్తకం తెచ్చాను. దానికి ముందుమాట దర్శకులు శ్రీ బి.నరసింగ రావు రాశారు. ఆదొక మజిలీ. తర్వాత కాలం విషయానికి వస్తే ఆంధ్రభూమిలో వచ్చే వెన్నెల పేజీలో శ్రీ చల్లా శ్రీనివాస్ వున్నప్పుడు ‘సినీ సుమాలు’ పేర స్త్రీ పాత్రలు ముఖ్యాభినేతలుగా వున్న సినిమాల పైన రాశాను. వాటినీ ఆ తర్వాత అదే పేరుతో పుస్తకం తెచ్చాను. ఇవన్నీ ఇట్లా జరుగుతూ వుండగానే ఫిల్మ్ సొసైటీ ఉద్యమాన్ని నా ప్రధాన వ్యక్తీకరణ గా తీసుకుని అర్థవంతమయిన సినిమాల్ని అందరికీ చూపించాలనే లక్ష్యంతో కాలాన్నంతా వెచ్చించాను. అయితే సాహిత్యంతో నా అనుబంధం తెగిపోలేదు. సినిమా సాహిత్యాల రూపాలే వేరు తప్ప సృజనాత్మకంగా అవి రెండూ వేరు కాదని విశ్వసించిన వాణ్ని. అవి రెండూ పరస్పర ఆధారితాలూ ప్రభావితాలే తప్ప భిన్నమయినవి కాదు అన్నది నా నిశ్చితాభిప్రాయం. అయితే ప్రధాన స్రవంతి సినిమాల్లో వ్యాపారమే ప్రధానమయిపోయింది. సమాంతర అర్థవంతమయిన సినిమాల్లో కూడా డబ్బు ప్రమేయం వున్నప్పటికీ అవి వ్యక్తులూ, సమాజమూ, రెంటిలో వుండే సంఘర్షణ దాని ప్రతిఫలనాల్ని ప్రతిబింబించాయి.అయితే సినిమా సాహిత్యాల నడుమ వున్న ట్రాస్పరెంట్ విభజన తెరని అర్థం చేసుకోవాలి.

ఇదంతా ఇట్లా వుంటే 2005-06 ప్రాంతాల్లో అనుకుంటాను ‘ఆంధ్రజ్యోతి’ దినపత్రిక కరీంనగర్ జిల్లా ఎడిషన్ లో ఒక సాహిత్య పేజీ నిర్వహించాలని తలపోశారు. ఎడిటర్ కె.శ్రీనివాస్, కరీంనగర్ బ్యూరో చీఫ్ శ్రీ నగునూరి శేఖర్ ఆ భాధ్యతని నాకు అప్పగించారు. ‘విద్యుల్లత’ పేర సాగిన ఆ పేజీ నిర్వహణ దాదాపు రెండేళ్లపాటు సాగింది. ఆ క్రమంలో మిత్రుడు శేఖర్ అందించిన ప్రోత్సాహాం అనితర సాధ్యమయింది. ఆ పేజీలో కవిత్వం, సాహిత్య వ్యాసాలతో పాటు నేనూ ఒక కాలం రాశాను. దాని పేరు ‘మానేరు గలగల’ దాంట్లో వున్నవన్నీ కరీంనగర్ జిల్లా సాహిత్యా కారుల ప్రొఫైల్ ఆర్టికల్స్. ఆవన్నీ మా కరీంనగర్ ప్రతిభామూర్తుల పైన రాసిన వ్యాసాలు. మానేరు గల గల వారి కళావిష్కరణ. వాటిల్లో పీవీ నుంచి అలిశెట్టి ప్రభాకర్ దాకా అన్నివాదాల రచయితల్ని గురించీ రాశాను. వాటన్నింటినీ కలిపి ఆదే “మానేరు గలగల” పేరుతో పుస్తకం తెచ్చాను. అట్లా మా మానేరు నది నా సాహిత్య జీవితంలో ప్రధాన ప్రేరణ అయింది.  మరో రకంగా చెప్పుకుంటే అంతర్భాగమయింది. చిన్నప్పుడు హోళీ అడిన తర్వాత పెయ్యికి బట్టలకు అంటుకున్న రంగులు కడుక్కోవడానికి కొన్ని సార్లు మానేరుకు వెళ్ళే వాళ్లం. ఆనాటి నుండి మానరు నాకు ప్రేరణ నా భూమిక.

దాని తర్వాత ఆంధ్రభూమి దినపత్రికలో ఉత్తర తెలంగాణ నాలుగు జిల్లాల పరిధిలో అంటే కరీంనగర్ ఆదిలాబాద్, వరంగల్,నిజామాబాద్ జిల్లాలకోసం జిల్లా ఎడిషన్ లో రెండు పేజీల స్ప్రెడ్ ఓవర్ నిర్వహించాలని సంపాదకుడు శ్రీ ఎం.వి.ఆర్..శాస్త్రి నిర్ణయించారు. హైదరాబాద్ లో జింబో సూచనల మేరకు నన్ను సంప్రదించారు. ఆయన ఒక రోజు ఆచార్య జయధీర్ తిరుమల రావు తో కలిసి కరీంనగర్ వచ్చారు. మా ఫిల్మ్ భవన్ లో అందుబాటులోవున్న కవులు రచయితలతో సమావేశం ఏర్పాటు చేసాము. ఆ సమావేశంలో మెరుపు వివరాల్ని ప్రకటించారు. సృజనకారులంతా సహకరించాలని సూచించారు. ఇంకేముంది మా ఎస్.ఆర్.ఆర్.కాలేజీ ఎదుటే వున్న ఆంధ్రభూమి ఆఫీసుకి వారం వారం పోవడం ‘మెరుపు’ పీజీకి అవసరమున్న కవితలు, వ్యాసాలు, పుస్తక సమీక్షలు పలువురితో రాయించి ఇవ్వడం మొదలయింది. నాలుగు జిల్లాల్లో వున్న అనేకమంది కవులు రచయితలు ఎంతగానో సహకరించారు. అప్పుడు తెలంగాణ ఉద్యమం ఉధృతంగా జరుగుతున్న సందర్భం. నేను వారం వారం ఒక రచయిత లేదా కవి తో ముఖాముఖీ నిర్వహించడం మొదలు పెట్టాను. అందులో జింబో. పెద్దింటి అశోక్ కుమార్, దర్భశయానం, నలిమెల భాస్కర్, వఝల శివకుమార్, చొప్పకట్ల చంద్రమౌళి, కోవెల సుప్రసన్న, అంపశయ్య నవీన్, కాత్యాయిని విద్మహే, బన్న ఆయిలయ్య, తుమ్మేటి రఘోత్తమ్ రెడ్డి,లాంటి అనేక మందిని ఇంటర్వ్యూ చేశాను. ఆ ఇంటర్వ్యూలతో పాటు  మరిన్ని పుస్తక సమీక్షల్ని కలిపి “మెరుపు” పుస్తకం తెచ్చాను. దాన్ని సీనియర్ ఐ ఏ ఎస్ అధికారి ఆత్మీయుడు శ్రీ సి.పార్థసారధి ఆవిష్కరించారు.

నాకు పత్రికలతో వున్న అనుబంధం గురించి కనుక ఈనాడు, సుప్రభాతం, మాభూమి లాంటి వాటికి పని చేయడం ఒక వైపు, ఇంకోవైపు కాలమ్స్ రాయడం నా సృజనాత్మక జీవితం పత్రికలతో పెనవేసుకునే వుంది.

వాటికి సమాంతరంగా పలు సాహితీ సాంస్కృతిక సంస్థలతో కూడా పని చేశాను ఆ వివరాలు మళ్ళీ రాస్తాను..ఇప్పటికీ సెలవు.

-వారాల ఆనంద్               

24 అక్టోబర్ 2023