కవిత్వమూ సామాజిక ఉద్యమాలూ ఆమెకు రెండు కళ్ళు- సుగత కుమారి

Posted on November 7, 2022

+ వారాల ఆనంద్

‘పువ్వు వికసించినంత సహజంగా నాలో కవిత్వం జనిస్తుంది’ అంటారు సుగత కుమారి. అంతే కాదు ‘నేను కేవలం పాడగలను అంతే…  ‘ ఎట్లా ఏమిటి అంటే నేనేమీ వివరించలేను అంటా రావిడ. ఆమె కవిత్వం నిండా మనుషుల పట్ల ప్రేమా, మనుషుల యొక్క  వేదన ధ్వనిస్తాయి. అంతేకాదు పర్యావరణ సమస్యలు.అస్తిత్వ పరితాపాలు, ప్రేమకోసం స్త్రీల అన్వెషణలు ఇట్లా అనేక అంశాలు ఆమె కవిత్వంలో ప్రతిధ్వనిస్తాయి.

      1970 లలో మలయాళ సాహిత్యం లో ఆధునికత వెల్లివిరుస్తున్న నాటికే సుగత కుమారి సుప్రసిద్ధ కవి.  నిజానికి ఆనాటి కేరళ ఆధునిక సాహిత్యా ఆవరణంలో స్త్రీ స్వరాలు తక్కువే. అధికంగా పురుష సాహితీ వెత్తలే ఆధునిక సాహిత్య దివిటీని పట్టుకుని ముందుకొచ్చారు. కాని 1975 లో ఎప్పుడయితే సుగత కుమారి తన ‘రాత్రిమజ’ (నైట్ రెయిన్)  కవిత రాసిందో అప్పుడే ఒక స్థిరమయిన స్వంతదయిన మహిళా గొంతుక వినిపించింది. ఇక అప్పటినుండి ఆ గుంతుక విస్తారంగా మాట్లాడుతూనే వుంది. ఒక్క సాహిత్య రంగం లోనే  కాదు అనేకానేక సామాజిక ఉద్యమాలకు వెన్నుదన్నుగా ఉంటూ అనేకమంది సాహిత్య కారులని సామాజిక ఉద్యమాలకు మద్దుతును కూడగట్టే పనినీ ఆమె విజయవంతంగా చేసారు. ముఖ్యంగా పర్యావతనం, మహిళా సాధికారికత లాంటి అంశాల్లో సుగత కుమారి చేసిన కృషి విశేషమయింది. ఓ పక్క రాస్తూనే మరో పక్క ఉద్యామాలు నడిపించారామే.

నిజానికి మలయాళీ సాహిత్య చరిత్రలో మహిళల పాత్ర తక్కువే. అక్కడ మీరాకానీ, అక్క మహాదేవి కానీ, ఆండాళ్ లాంటి కవయిత్రులు గానీ లేరు. కేవలం అరబిక్ మలయాళం గీతాల్లో కొన్ని సార్లు ఏవో కొన్ని పేర్లు వినిపిస్తాయి. ముఖ్యంగా 19 వ శతాబ్దం లో కుట్టికుంజు తన్గాచీ, తోట్టాయికట్టు ఇక్కవమ్మ లాంటి కొంత మంది ఎదిగి వచ్చారు. వారి తర్వాత అక్కడ కవయిత్రిగా ఎదిగి గణింప దగ్గ కృషి చేసిన వారిలో సుగత కుమారి అత్యంత ప్రముఖులు.

…

సుగత కుమారి 22 జనవరి 1934 న జన్మించారు. ఆమె తండ్రి బోదేశ్వరన్ గా పేరుగాంచిన కేశవ పిళ్ళై స్వాతంత్ర సమరయోధుడు. గాంధేయ వాది. ఆమె తల్లి కాత్యాయనీ అమ్మ సంస్కృత పండితురాలు. ఆ ఇద్దరి ప్రభావం చిన్నప్పుడే సుగత కుమారి పైన పడింది. చదువు పట్ల అమిత ప్రేమ వున్న ఆమె తన డిగ్రీ విద్యను తిరువనంతపురం లోని యునివర్సిటీ కాలేజీలో పూర్తి చేసారు. తర్వాత తత్వశాస్త్రం లో పీజీ చేసారు. ఆ తర్వాత మూడేళ్ళపాటు పరిశోధనా రంగం లో ఉన్నప్పటికీ తన పీ.హెచ్.డీ. పూర్తి చేయలేకపోయారు. ఆమె ఫిలాసఫీ తో పాటు విద్యా మనస్తత్వ శాష్ట్రంలో కూడా మంచి అభినివేశాన్ని పొందారు. తాను తన మొట్టమొదటి కవితను 1957 లో రాసారు. తన మొదటి కవితను ఆమె కలం పేరుతో రాసారు. విద్యార్థిగా ఉన్నప్పుడే ఆమె రాష్ట్ర విద్యార్థి సంఘం ఉపాధ్యక్షురాలిగా కూడా పనిచేసారు.

సుగత కుమారి కి 1978 లోనే ఆమె రాసిన ‘పతిరా పుక్కయి’( FLOWERS OF MIDNIGHT )  కవితా సంకలనానికి కేంద్ర సాహిత్య అకాడెమీ అవార్డు లభించింది. అమె రచనల్లో ముఖ్యమయినవి ముత్తు చిప్పి, పతిర పూక్కల్, పావం పవం మానవ హృదయం, ప్రణామం, ఇరుచిరకుకల్, రాత్రి మజా, అంబాల మని, రాదేయవిడే, దేవదాసి, అభిసారిక లాంటివి అనేకం వున్నాయి. ఆమెకు కేంద్ర సాహిత్య అకాడెమి అవార్డు తో పాటు ఒడకుజ్జల్ అవార్డు, వయలార అవార్డు, ఆసాన్ అవార్డు, వీ టీ సాహిత్య అవార్డు, బషీర్ పురస్కారం, సరస్వతీ సమ్మాన్, కేరళ సాహిత్య అకాడెమీ అవార్డు తో పాటు ఇంకా అనేక అవార్డులు లభించాయి. తనకు 2006 లో పద్మశ్రీ అవార్డు కూడా లభించింది.  

పర్యావరణాన్ని కాపాడేందుకు కూడా పోరాటం చేసారు. మూడు దశాబ్దాల కింద పశ్చిమ కనుమల్లోని సైలెంట్ వ్యాలీలో హైడల్ ప్రాజెక్ట్‌ను నిర్మాణాన్ని అడ్డుకొన్నారు. అందుకోసం పెద్ద ఉద్యమాన్నే లేవదీసారు. తన కవితలతో ప్రజల్లో చైతన్యాన్ని రగిల్చారు. ఇటీవల కూడా మరో ఉద్యమానికి ఆమె నాయకత్వం వహించారు. అర్నములాలో విమానాశ్రయం నిర్మాణానికి వ్యతిరేకంగా సుగతకుమారి నేతృత్వంలో ఉద్యమం చేపట్టారు. అట్లా సుగాతా కుమారి కవిత్వం రాయడం తో పాటు అనేక సామాజిక ఉద్యమాల్లో ప్రధాన భూమికను పోషించారు. ముఖ్యంగా సలేంట్ వాలీ ఉద్యమంలో ఆమె కృషి గొప్పది. ఆమె తాను పాల్గొనడం తో పాటు అనేకమంది మలయాళీ సాహితీ వేత్తల్ని ఈ ఉద్యమానికి మద్దతుగా కూడగట్టారు.

ఫలితంగా ‘సైలెంట్ వ్యాలీ’ ఉద్యమంలో రచయితలు తమ రచనల్ని కొనసాగించారు.భౌతిక పర్యావరణాన్ని కాపాడడం కోసం విలువల ప్రాముఖ్యతను చెప్పారు. సామాజిక అంశాల్నిశాస్త్రీయ అంశాలతో జోడించారు. అది పర్యావరణీయం అయ్యింది. కవులు రచయితలూ ఉద్యమంలో చేరేసరికి ఉద్యమం తీవ్ర స్ధాయికి చేరింది, ఆ వేగాన్ని వీరు మరింత పెంచారు. వైకం బషీర్,యస్.కే. పోట్టేకర్,ఓ,వీ. విజయన్, కే.భాస్కరన్ నాయర్, సుకుమర్ర్ అజ్హికోడే వంటి వారు ఉద్యమంలో కీలక పాత్ర వహించారు. వివిధ ప్రయోగాలు చేసారు అందులో భాగంగా  1983లో 34 కవితలతో కూడిన ‘వనపర్వం’ అన్న కవితా  సంపుటిని ప్రచురించారు. సుగత కుమారి సైలెంట్ వ్యాలీని

 ‘దట్టమైన,చల్లని, జీవం ఉట్టిపడుతున్న ప్రదేశం, భూమి వ్యక్త పరిచిన అత్యత్భుతమైన భావన’ అంటారు.

ఆ భావాలన్నీ వనపర్వంలో చోటుచేసుకున్నాయి. వనపర్వం అన్న శీర్షికకి స్ధానికులు సైలెంట్ వ్యాలీ గురించి చెప్పే కధకి పోలిక వున్నది. ఈ ప్రాంతాన్ని సైరంధ్రి వనం అంటారు. ద్రౌపది కి వున్న మరో పేరు సైరంధ్రి. వనవాసమప్పుడు పాండవులు ఇక్కడ కొంత కాలం గడిపారని వారి నమ్మకం. కాలక్రమేణా బ్రిటిష్ వారి కాలం వచ్చే సరికి సైరంధ్రి వనం సైలెంట్ వ్యాలీ గా మారింది.  ఈ ప్రాంతాన్ని  చిపింగ్ సిడా అన్న అడవి  క్రిమి వల్ల కూడా సైలెంట్ వ్యాలీ అన్న పేరు వచ్చింది అన్న నానుడి కూడ వుంది.

     సాహిత్యం ద్వారా కేవలం సైలెంట్ వ్యాలీ అంశాలనే కాక ప్రకృతి మానవ మనుగడ గురించి విశిష్టంగా ‘ప్రకృతి సంరక్షణ,సుస్ధిర జీవనం’ అన్న నినాదం తో ప్రకృతి సంరక్షణ సమితి పని చేసింది. సైలెంట్ వ్యాలీ ఉద్యమం ప్రచారానికి కేరళ నలుమూలల వివిధ కళా రూపాల ద్వారా ప్రచారం చేసారు. 1980 జూన్,6 వ తేదీన కవులను సత్కరించారు. ప్రముఖ కవులు కవితలు చదివి పర్యావరణ విశిష్టతను చెప్పారు. సైలెంట్ వ్యాలీ సంరక్షణకు వివిధ స్ధాయిల్లో సమితి కృషి చేసింది. అందులో సుగత కుమారి ప్రముఖ పాత్ర పోషించారు ,ఆమె రచించిన ‘మరతిను స్తుతి’(వృక్ష గీతం) విశిష్ట ప్రాచుర్యం  పొందింది. ఈ కవితలో ఆమె చెట్టుని, భూమిని కాపాడడానికి  విషం తాగిన శివుడిగా వర్ణిస్తారు. నేను అతనిని పూజిస్తాను/ ఎవరైతే శ్వాస గాలినిస్తారో/ విషం తాగి/నీలకంటుడిలా’(5-8). ఇదంతా పాటకుడికి కిరణజన్య సంయోగంగా అనిపించవచ్చు. ఈ కవిత ప్రకృతి సమతుల్యతను శాస్త్రీయంగా వివరిస్తుంది. ప్రకృతిలో చెట్టు పాత్రను ,అది మానవ మనుగడకు చేసే ఉపయోగాలను.

నువ్వు  మా

తల్లి భూమిని వరదల నుండి రక్షిస్తావు

నేలను పునర్జీవింప చేస్తావు

నువ్వుఅమృతాన్ని భద్ర పరుస్తావు

దివినుండి భువి కి వస్తున్న దానిని

ఉబుకుతున్న నీ గుండెల్లో(౩౩-40,పంక్తులు)

భూమి ఏమైనా ఆడుకునే బంతా లేక ఆడుకునే బొమ్మా! (43-44 పంక్తులు)

ఈ కవితలో భూమి కున్న ఓపికను పరిక్షించొద్దని హెచ్చరిస్తారు. దీని ద్వారా  ‘ప్రకృతి మన తల్లి ,ఆమెని పూజ్య భావంతో, ప్రేమతో దరి చేరమని  చెపుతారు. మన చర్యలు విధ్వంశంగా వుంటే ప్రకృతి ప్రతిచర్యలు అదే విధంగా ఉంటాయి’ ఇది అర్ధం చేస్కునే సునిశిత మనకు అవసరం.

మానవసేవే.. మాధవ సేవ.. దీన్ని అక్షరాల పాటించారు సుగుత కుమారి. కల్లాకపటం, కల్మషం లేని మానసిక రోగులకు ఆశ్రయం కల్పిస్తూ వారికి మరో జన్మ కల్పించారు. కేరళలోని ప్రభుత్వ మానసిక వైద్యశాలలో రోగుల దుస్థితిని చూసి చలించి, మానసిక రోగుల కోసం ఏకంగా ఆమె ఓ గ్రామాన్నే నెలకొల్పారు. వేలాదిమందిని తన పిల్లలుగా చూసుకుంటూ, వారి కలలనే తన కలలుగా చేసుకుంటూ జీవితాన్ని గడిపారు. మానసిక రోగులకే కాదు, అనాథ బాలికలు, మహిళలు, ఆల్కాహాల్, డ్రగ్ బాధితులకు కూడా ఆశ్రయం కల్పించారు. అన్ని కేర్ హోమ్ సెంటర్‌లాంటిదిగా కాకుండా అక్కడ వీరూ వారూ అనే తేడా లేదు.. అక్కడ అందరికీ చోటు ఉంటుంది. తిరువనంతపురంలోని కేర్ సెంటర్‌లో లైంగిక వేధింపుల బాధితులు. గృహ హింస బాధితులు. డ్రగ్ అడిక్ట్స్ కు వసతి కల్పించారు. అనాథ బాలికలు. ఎవరూ లేని మహిళలకూ నివాసం కల్పించారు. వారు ఎదుర్కొన్న సమస్యలన్నీ వారికి గతం అయిపోయి వారు కొత్త జీవితాన్ని గడుపుతున్నారు. చదువుకుంటున్నారు. ఉపాధి పొందుతున్నారు. పూర్తి ఆత్మవిశ్వాసంతో మరో కొత్త జీవితానికి పునాది వేసుకుంటున్నారు. మూడు దశాబ్దాల సేవ..

ఇంకా సుగతకుమారి ఆధ్వర్యంలో తిరువనంతపురంలో అనాథలు, నిరాశ్రయులు, బాధితుల కోసం ఎయిటీస్‌లో ‘అభయ’పేరుతో ఓ ఆశ్రమాన్ని నెలకొల్పారు. లైంగిక వేధింపుల బాధితులతోపాటు వివిధ కారణాలతో అనాథలుగా మారిన, నిరాశ్రయులైన వేలాదిమంది జీవితాల్లో ఈ సంస్థ వెలుగులు నింపింది. ‘అభయ’కు మొదటి నుంచి నిధుల కొరత ఎదురుకొంది.అయినా నిధుల కొరత కారణంగా సౌకర్యాలు కూడా అంతంత మాత్రమే వున్నా ఆ సంస్థలో చేరిన వారు మాత్రం పూర్తి ఆత్మవిశ్వాసంతో బయటకు నిలదొక్కుకున్నారు. ఆశ్రమంలో చేరినప్పుడు బేల చూపులు, భవిష్యత్‌పై భయంతో కనిపించిన వారి కళ్లలో మెరుపులు నిండాయి. గొప్ప ఆత్మ విశ్వాసం నిండిన వ్యక్తిత్వం తో భవిష్యత్‌పై ఆశతో కొత్త జీవితాల్ని ఆరంభిస్తున్నారు. సుగతకుమారి విజయానికి ఇవే ప్రత్యక్ష నిదర్శనాలు. 14 జిల్లాల్లో పునరావాస కేంద్రాలు..

‘సరస్వతి సమ్మాన్’ అవార్డు గ్రహీత, రచయిత్రి సుగతకుమారీ ‘అభయ’ను మరింత విస్తరించాలనుకున్నారు. మానసిక వైకల్యంతో బాధపడుతున్నవారి కోసం కేరళలోలని 14 జిల్లాల్లో పునరావాస కేంద్రాలను ఏర్పాటు చేయడం కోసం ఇందుకు సంబంధించిన ప్రతిపాదనలను కూడా ఇప్పటికే ప్రభుత్వానికి పంపారు.

 కేరళలలోని ప్రభుత్వ ఆసుప్రతులలో మానసిక వ్యాధిగ్రస్తులను పట్టించుకోకపోవడంతో 1985లో ప్రత్యేకంగా మానసిక రోగుల కోసమే ‘అభయ’ ఏర్పాటైంది. ‘‘ఇప్పటికే ముప్పై ఏళ్లు గడిచిపోయాయి. వేలాదిమంది నిరాశ్రయులకు జీవితంపై ఆశ కల్పించాం. ఈ మూడు దశాబ్దాలలో వదిలివేసిన, నిరాశ్రయులైన, అనాథలకు అండగా నిలిచాం’’ అనుకోకుండా ‘అభయం’ ఏర్పాటయింది. ప్రస్తుతం మల్టీ యూనిట్ ఇన్‌స్టిట్యూట్‌గా ఎదిగింది. అక్కడ పునరావాసంతోపాటు చికిత్సను కూడా అందిస్తున్నారు. డీ అడిక్షన్ సెంటర్, అనాథ బాలికలకు కేర్‌హోమ్, మహిళలకు వసతి గృహాలను నెలకొల్పారు. సన్నిహితులంతా ‘టీచర్’ అని పిలుచుకునే సుగత కుమారి ఓసారి తిరువనంతపురంలోని ప్రభుత్వ మానసిక వైద్యశాలను సందర్శించారు. ఆ సమయంలో రోగులతో ఆస్పత్రి సిబ్బంది ప్రవర్తిస్తున్న తీరుతో ఆమె కలత చెందారు. ఆ సమయంలోనే ‘అభయ’ను నెలకొల్పాలని ఆమె డిసైడయ్యారు. ‘‘మేం అడుగుపెట్టేవరకు కేరళలో మానసిక రోగుల పరిస్థితి ఘోరంగా ఉండేది. వారిని పట్టించుకునే నాథుడే లేరు. హాస్పిటల్‌లో నేను చూసిన పరిస్థితులను వివరించడానికి కూడా నోరు రావడం లేదు.. అర్ధనగ్నంగా, గాయాలతో రోగులు విలవిలలాడుతూ కనిపించారు. ఓ చిన్నరూమ్‌లో వారిని బంధించారు. చాలామంది నా కాళ్లు పట్టుకుని భోజనం పెట్టమని వేడుకున్నారు’’ అని ఆనాటి పరిస్థితులను ఆమె కళ్లకు కట్టారు. 81 ఏళ్ల సుగతకుమారి పోరాట ఫలితంగా, ఏళ్లుగా అధికారుల వెనకపడిన నేపథ్యంలో ప్రస్తుతానికైతే పరిస్థితుల్లో కొద్దిగా మార్పు వచ్చింది. ప్రస్తుతం ‘‘అభయ’ సేవలను మరింత విస్తరించారు. మలయిన్‌కీజు గ్రామం శివార్లలో 10 ఎకరాల విస్తీర్ణంలో ‘అభయగ్రామం’ పేరుతో మానసిక రోగుల కోసం మరో ప్రపంచాన్ని 1992లో నిర్మించారు. ఈ ‘అభయ గ్రామం’ నర్వ్ సెంటర్‌కు ప్రఖ్యాత టిబెట్ ఆధ్యాత్మిక గురువు దలైలామా పునాది రాయి వేశారు. దలైలామా స్ఫూర్తితో.. దలైలామా ప్రసంగాలు విని, స్ఫూర్తి పొందే సుగతకుమారి, నిరాశ్రయులకు బాసటగా నిలుస్తున్నారు. ‘‘ఓసారి దలైలామా ఇలా అన్నారు. ఈ భూమిని నిరుపేదలకు, ఇళ్లులేని వారికి ఆశ్రయంగా చేయాలి అని. అప్పటి నుంచి ఆయన ఆశయాల సాధనకు ప్రయత్నిస్తున్నాను’’ అని ఆమె తెలిపారు. ప్రస్తుతం అభయ ఎనిమిది కేంద్రాలుగా విస్తరించింది, మానసిక వైకల్యంతో బాధపడుతున్న వారికి చికిత్స, ఆశ్రయం కోసం ‘కర్మ’ మానసిక రోగల తాత్కాలిక, దీర్ఘకాల సంరక్షణ కోసం ‘శ్రద్ధభవనం’, మిత్ర పేరుతో డీ అడిక్షన్, మెంటల్ హెల్త్ సెంటర్‌ను నిర్వహిస్తున్నారు. అనాథ బాలికల కోసం ‘అభయబాల’, మహిళల తాత్కాలిక వసతి కోసం ‘అతని’, అల్కాహాల్, డ్రగ్‌ బాధితుల కోసం ‘బోధి’ మానసిక రోగుల కోసం ‘పకల్‌వీడు’ డే కేర్ సెంటర్లను కూడా ‘అభయ’ నిర్వహిస్తోంది. ఇవే కాకుండా మహిళల కోసం 24 గంటల హెల్ప్‌లైన్, మహిళల కోసం ఉచితంగా న్యాయ సాయం కూడా అందిస్తున్నది. నిధుల కొరత.. నిరాశ్రయుల కోసం, ముఖ్యంగా మానసిక రోగుల కోసం వివిధ రకాల సెంటర్లను నిర్వహిస్తున్న ‘అభయ’ను నిధుల కొరత తీవ్రంగా వేధిస్తున్నది. ప్రస్తుతం ‘అభయ’లో 200 మంది నిరాశ్రయులు, 80 మంది ఉద్యోగులున్నారు. ‘ప్రభుత్వ కేటాయింపులు, వ్యక్తిగత విరాళాలపైనే ఆధారపడుతున్నాం. నిధుల కొరత కారణంగా ఎక్కువమందిని ఉద్యోగులను పెట్టుకోలేకపోతున్నాం. అందువల్ల నిరాశ్రయులు సమస్యలపాలవుతున్నారు. ఉద్యోగంలో పెట్టుకున్నవారికి సైతం సరిపోయేంత జీతం ఇవ్వలేకపోతున్నాం’’ అని సుగత కుమారి ఆవేదన వ్యక్తం చేశారు. ‘‘మతాలు, కులాలతో ‘అభయ’కు ఎలాంటి సంబంధం లేదు. ఇదే సంస్థకు బలమూ, బలహీనత. ఒకవేళ ఎదైనా మతపర సంస్థతో సంబంధం ఉండి ఉంటే, లక్షల రూపాయలు విరాళాలుగా వచ్చేవి’’

అట్లా కవిత్వాన్ని శ్వాసిస్తూ సమాజం కోసం కృషి చేస్తూ సుగత కుమారి తన 87 వ ఏట, 23 డిసెంబర్ 2020 రోజున తిరువనంతపురం ప్రభుత్వ మెడికల్ కాలేజీ లో కోవిడ్ 19 కు చికిత్స పొందుతూ తనువు చాలించారు. పూర్తి ప్రభుత్వ లాంచనాలతో ఆమె అంతిమ యాత్ర నిర్వహించారు.

ఆమె కవితల్లోంచి తెండు కవితలకు నేను చేసిన అనుసృజన ____

నువ్వు వెళ్లి పోయింతర్వాత

+++++

నువ్వు వెళ్లి పోయింతర్వాత ! చూడు

నేనిక్కడే వున్నాను, వెన్నెలా ఇక్కడే వుంది

పగలూ రాత్రీ ఏ కొంచెమూ మారలేదు

ఆకాశంలో నక్షత్రాలున్నాయి

అయినా చీకటి పడే వేళ

ఇంట్లో నేను దీపం వెలిగిస్తూనే వున్నాను

నువ్వు వెళ్లి పోయింతర్వాత

పున్నమి చంద్రుడు విరగబడి నవ్వుతున్నాడు

అయినప్పటికీ మన చీకటి పెరట్లో

పాల వెన్నెల చిందిస్తూనే వున్నాడు

రాత్ర మల్లెలు ఎప్పటిలాగే విరగబూస్తున్నాయి

చల్లటి గాలి సువాసనలు అట్లాగే వున్నాయి

పట్టు వీడకుండా చిన్న పిల్లాడి ఏడుపును వింటూనే వున్నాను

ప్రతిదీ ఎప్పటిలాగే మామూలుగానే వున్నాయి

స్నానం నిద్ర పేపర్ చదవడం

ఎంతో పని వుంది అతిథులు వస్తూనే వున్నారు

నిత్య కృత్యాలు మామూలుగా సాగుతూనే వున్నాయి

నువ్వు లేకున్నప్పటికీ  అన్నీ అర్థం లేకుండా

ఎప్పటిలాగే సాగుతూనే వున్నాయి

పగిలిన పూల కుండీలో పాత తులసి మొక్క

ఎవరూ నీళ్ళు పోయాక ఎండిపోతున్నది

ఇప్పటికీ కేవలం నీ జ్ఞాపకాల్లో

అన్నీ యధావిధిగానూ ప్రతిదీ మామూలుగానూ వున్నాయి  

ఇదంతా యువ యాత్రికుల కోసం రాస్తున్నాను

చేతిలో చెయ్యేసి

నడవడానికి కొంచమయినా సమయం లేదు…

కోరికకు… ప్రేమకు కూడా..

++++++++++++++++++++++

మూలం- సుగత కుమారి

         స్వేచ్చానువాదం – వారాల ఆనంద్

*********************************

రాత్రి వాన (NIGHT RAIN)

*******

రాత్రి వాన

ఏ కారణమూ లేకుండానే

నవ్వుతోంది ఏడుస్తోంది

విరామం లేకుండా అర్థం లేని

గుస గుసలు పోతోంది

తన పొడవయిన నల్లని వెంట్రుకల్ని గాలిలో వూపుతోంది

అది వంగి కూర్చున్న ఓ యువతిలా వుంది

 రాత్రి వాన

ఆసుపత్రి వార్డుల్లోకీ ప్రవహిస్తుంది

అంతు లేని ఏడుపులో నన్ను

తన తెల్లని చేతులతో లాలిస్తుంది

అది జాలీల్లోంచి విస్తారంగా చేతులు సాచిన

చీకటి రాత్రి యొక్క దుఖపుకూతురు

రాత్రి వాన

నొప్పితో మూలుగులు షాకులు ఆశ్చర్యాలు కొపపు శబ్దాలు

ఒక్కసారిగా అమ్మ అరుపులు నన్ను ఆశ్చర్య పరుస్తాయి

చెవుల్ని మూసుకునేలా చేస్తాయి

అవన్నీ నన్నూ నా అనారోగ్యపు మంచాన్నీ చేరతాయి

రాత్రంతా బంధువుల్లా

ఓదార్పు మాటలతో నన్ను వూరడిస్తాయి

ఎవరో అన్నారు

పాడయిపోయిన అవయవాల్ని తొలగించాలని

కాని వాటికంటే ఎక్కువగా పాడయిన

మనసు సంగతేమిటి

రాత్రి వాన

గతంలో నా సంతోషపు రాత్రుల్లో నన్ను ఎంతగానో నవ్వించింది

అమితంగా పులకింపజేసింది

నా కెంతో ప్రేమను మరెంతో ప్రకాశ వంతమయిన

వెన్నెలనీ ఇచ్చింది

గాఢ నిద్రలో ఉలికి పాటుకు గురి చేసింది

నా ప్రేమకు గత కాలపు సాక్షంగా నిలిచింది

‘రాత్రి వాన’..

నేనివ్వాళ అనారోగ్యంతో మంచం మీద ఒంటరిగా అసహనంగా

అటూ ఇటూ దొర్లుతూ కనీసం ఏడవడాన్నీ  మర్చిపోయి

శిలలా గడ్డ కట్టుకు పోయి

నా వేదనకు కొత్త సాక్షంగా మారాను

రాత్రి వానకు చెప్పేస్తాను

నీ దుఖభరిత తడి పాట నాకు తెలుసు

నీ దయాగుణం, అణచి వేయబడ్డ నీ ఆవేశం

చీకట్లో నీ రాక, నీ ఒంటరి ఏడుపు

కన్నీళ్లను త్వర త్వరగా నువ్వు తుడిచి వేయడం

ఎదో నెపం మీద త్వరపడ్డం ఏడవడం నవ్వడం

నాకు తెలుసు నాకన్నీ తెలుసు

ఎందుకో నీకు తెలుసా

నా ఆత్మ సహచరుడిగా నేనూ నీలాగే వున్నాను

ఇలాగే వున్నాను రాత్రి వానలా…  

         మూలం- సుగత కుమారి

         స్వేచ్చానువాదం – వారాల ఆనంద్