Eenadu Sunday edition

Posted on November 11, 2018

భూమిని తినేసింది..!

ఎండిన ఆకులు చెట్టుమీదినుంచి రాలిపడటం సహజం. ఆ ఆకుల గలగలలు ఏదో చెప్పాలనుకున్నాయి. వాటిని గుల్జార్‌ విన్నారు. ‘పర్యావరణాన్ని రక్షించండి. భూగోళాన్ని ఆకుపచ్చగా ఉంచండి’ అని ఆ ఆకులు ఆయనకు చెప్పాయి. అవేకాదు, చెట్లూ పర్వతాలూ నదులూ జలపాతాలూ తమ కథల్ని వినిపించాయి. వాటినే ఆయన ‘గ్రీన్‌ పొయెమ్స్‌’ పేరుతో ప్రచురించారు. వాటి తెలుగు అనువాదం ఇది. లచ్చి పుట్టినప్పుడు మంత్రసాని బొడ్డుకోసి పడేసింది తన ఒడిలోనే. అటువంటప్పుడు దుర్మార్గుడి చేతిలో మోసపోయి తల్లి కాబోతున్న లచ్చిని ఊరివారి చీదరింపులకు గురికాకుండా కడుపులో పెట్టుకోవాల్సిన బాధ్యతా తనదేననుకుంటుంది ముసలి నది. రాళ్లేసి కొట్టినా, ఎక్కి కొమ్మల్ని విరగదొక్కినా కిక్కురుమనని చెట్టు, కడుపుతో ఉన్న భార్యకి పుల్లని కాయల్ని ఇచ్చిన చెట్టు- దాన్ని కొట్టేస్తుంటే ఎవరు మాత్రం చూడగలరు ఆ దృశ్యాన్ని? ‘ఎట్లా జరిగిందో ఏమో… భూమికి ప్రాణి ఎట్లా సోకిందో ఏమో… భూమిని కొంచెం కొంచెంగా తినేసింది’ అన్న మాటలు – సమస్యను హృదయాల్ని తాకేలా చెప్పిన కవి ప్రతిభకి మచ్చుతునకలు.

గుల్జార్‌ ఆకుపచ్చ కవితలు
అనువాదం: వారాల ఆనంద్‌; పేజీలు: 155; వెల: రూ. 125/-
ప్రతులకు: ప్రధాన పుస్తకకేంద్రాలు
– పద్మ